میں ، سید مودودی اور جماعت اسلامی

سید کاظم حسن نقوی:

میرا تعلق یوپی کے شہر امروہہ کے ایک شیعہ گھرانے سے ہے جو تقسیم ہند کے بعد کراچی میں آکر آباد ہوا، میرے دادا شاگرد تھے رئیس امروہوی، سید محمد تقی،اور جون ایلیا کے والد علامہ شفیق حسن ایلیا کے۔ میرا کوئی تحریکی یا جماعتی پس منظر نہیں تھا۔

پروفیسر تقی حسن نقوی جو France میں فلسفے کے استاد ہیں رشتے میں میرے تایا ہیں۔ ایک دن انہوں نے باتوں ہی باتوں میں تذکرہ کیا کہ
”آج کا نوجوان بہت خوش قسمت ہے کہ علم کے ”دور مودودی“ میں بس رہا ہے ورنہ ہمارے زمانے میں تو یہ عالم تھا کہ کوئی بھی نوجوان بال بڑھا کر داس کیپیٹل ہاتھ میں لیے مارکس کا فلسفہ بگھار کر ہمیں اپنے جال میں پھانس سکتا تھا اور دین و مذہب کی اساس پر اس کے حملوں کے مقابل ہمارے پاس کوئی جواب نہ تھا ۔ مگر آج دنیا بھر کے مسلمان نوجوانوں کے ہاتھ میں سید مودودی کی کتابوں کی صورت میں وہ ہتھیار موجود ہے کہ جس سے ناصرف وہ اپنی مدافعت کرسکتا ہے بلکہ جارحانہ علمی اقدام بھی کرسکتا ہے“۔

یہ کہہ کر انہوں نے سید مودودی کی کتاب ”تنقیحات“ میری طرف بڑھا دی اور مجھے کہا کہ اسے غور سے پڑھنا۔ میں نے کتاب ہاتھ میں لی اور پڑھنا شروع کیا۔ میں نے کتاب کو کیا پڑھا،گویا اس کتاب میں خود کو مجھ سے پڑھوایا۔ کیا کمال کی کتاب تھی، روایتی کتابوں سے بالکل مختلف، بالکل جدا، سلجھا ہوا اسلوب، مدلل انداز اور دلائل کا سیل رواں۔

اس کتاب کا حرف حرف میرے دل پر نقش ہو گیا۔ میں سچ کہتا ہوں کہ میں نے اس سے بہتر کتاب آج تک نہ پڑھی تھی۔ سید مودودی کی عظمت کی دھاک میرے دل پر بیٹھ گئی۔ پھر راولپنڈی میں قیام کے دوران میرے دیرینہ، ہم مشرب اور ہم راز دوست(جس کو نہ جانے کیوں نام ظاہر کرنے سے چڑ ہے) نے میری تحریکی حوالے سے ذہن سازی میں بہت کردار ادا کیا۔ مگر اس کے بعد ایک عرصہ تک سید مودودی کی کوئی کتاب پڑھنے کا موقع نہ ملا۔

میں اپنے معمولات میں مگن ہو گیا اور اس کتاب کا تاثر دماغ کے پچھلے گوشے میں منتقل ہو گیا۔ 2016 میں میں تعلیم کی غرض سے لندن میں گیا۔ وہاں میری جماعت میں صرف ایک اورمصری مسلمان تھا اس کا تعلق اخوان المسلمون سے ہے، احمد الحامد میری اس سے دوستی ہو گئی جو کہ بے تکلفی میں بدلتی چلی گئی۔

ایک دن اس نے مجھے سید قطب کی ایک کتاب دی اور کہا کہ اس کو پڑھو، واقعی سید قطب کی عربی کتاب کا انگریزی ترجمہ لا جواب تھا۔ ذہن کو متاثر کرنے والا ایک علمی اور ادبی شاہکار تھا۔ اس کتاب کے بعد اس میں اور مجھ میں کتابوں کا تبادلہ مسلسل ہوتا رہا ایک دن اس نے مجھے سید مودودی کی کتاب دینیات کا انگریزی ترجمہTowards Understanding Islamدیا ۔

میں ایک عرصے بعد سید مودودی کی کوئی کتاب دیکھتے ہی چونک پڑا ۔ میں نے متجسس انداز میں اس سے پوچھا:” تم سید مودودی کے بارے میں اور کیا جانتے ہو؟“ اس نے کہا:” کیا تمہیں یاد ہے کہ میں نے تمہیں پہلی کتاب سید قطب کی دی تھی تو سنو امام مودودی عدالت کے کٹہرے میں سید قطب کا اقرار جرم اور امام مودودی کا اسم مبارک پھانسی گھاٹ کی کوٹھڑی میں سید قطب کی تسبیح صبر اور وظیفہ استقامت تھا۔“

یہ کہتے ہوئے اس کی آنکھوں میں چمک سی پیدا ہو گئی تھی۔ دراصل سید مودودی سے محبت،ان کے افکار سے موافقت اور مصر میں ان کا پرچار سید قطب کے جرائم سمجھے گئے اور اس پر انہیں بالآخر موت کی سزا سنا دی گئی، میں نے اپنا ٹوٹا ہوا بندھن پھر سے استوار کیا۔ تنقیحات کے بعد دینیات، دینیات کے بعد خطبات، خطبات کے بعد تفہیمات۔ ایک کے بعد دوسری، دوسری کے بعد تیسری، سید مودودی کی تمام کتابیں پڑھ ڈالیں۔

میں نے کتابیں پڑھنے کے دوران یہ محسوس کیا کہ میرا قلب و ذہن بدل چکا ہے، اب میرے اندر سے صدا آ رہی ہے جو مجھے سیدی کے فکر کی طرف بلا رہی ہے۔ مجھے عمل کے لئے آمادہ کر رہی ہے۔ اس انقلاب کی طرف پکار رہی ہے کہ جو انسانیت کا مقدر ہو چکا ہے۔ میں نے احمد الحامد سے اپنا راستہ رابطہ مزید استوار کیا اور اس کے ساتھ اخوان کے اسٹڈی سرکلز میں جانا شروع کردیا۔

اسی دوران پاکستان سے آئے جماعت اسلامی سے وابستہ کچھ افراد سے رابطہ ہوا اور ان کے ذریعے سے UK Islamic Mission تک رسائی۔ میں دنیا کی مقدس ترین تحریک کا حصہ بن چکا تھا۔ عظیم ترین تحریک عالمگیر تحریک نیل کے ساحل سے لے کر تا بخاک کاشغر پھیلی ہوئی تحریک امریکا ، یورپ اور آسٹریلیا میں سرگرم عمل تحریک۔

یہ تحریک اس قدر عظیم ہے اس کا اندازہ باہر سے نہیں لگایا جا سکتا۔ میں مذہبی طور پر شیعہ مسلک سے تعلق رکھتا تھا ،کسی نے پوچھا تک نہیں۔ بس! مقصد پر focus اقامت دین کی جدوجہد،انقلاب کی دھن،دنیا کو بدل دینے کا سودا۔ یہ کیا معجزہ ہے کہ جس سے میں وابستہ ہو چکا ہوں اور ہاں! اس دفعہ کبھی کسی کو ووٹ نہ کرنے والے ڈیفنس کراچی میں مقیم میرے گھر والوں نے میرے ٹیلی فون پر اصرار کرنے پر جماعت کو vote بھی دیا۔