ام محمد عبداللہ
”یہ دیکھیں منزہ آپی خوبصورت سلاد۔“ اجالا نے نفاست سے سجاٸی گٸی سلاد کی پلیٹ منزہ آپی کے سامنے لہراٸی۔
وہ آج صبح سے ہی باورچی خانے میں مصروف تھی بقول اس کے اس نے آج خود کو دعوت پر بلایا تھا۔ وہ ہمیشہ سے ایسی ہی تھی رنگ برنگے کھانے پکانے، کھانے اور کھلانے کی شوقین۔
منزہ آپی نے توصیفی نگاہوں سے سلاد کو دیکھا اور کہنے لگیں:
”اچھا اب یہ سب چھوڑو نماز پڑھ لو۔ ظہر کی اذان ہو گٸی ہے۔“ منزہ آپی نے کہا تو اجالا نے بےمزہ ہو کر چولہے کی جانب دیکھا جہاں پکتے چاول اور سالن ابھی اس کی توجہ چاہتے تھے اور انہیں درمیان میں چھوڑ کر نہیں جایا جا سکتا تھا۔
مزے دار کھانوں کی شوقین اجالا صاحبہ ! نماز جنت کی کنجی ہے۔ کنجی حاصل نہیں کرو گی تو بھلا جنت کیسے جاٶ گی؟ اور کھانوں کا اصل مزہ تو جنت میں ہی ہے۔ جہاں بغیر مشقت کے کھانا ملے گا۔ نہ پکانے کا غم نہ برتن دھونے کا جھنجھنٹ۔
”کھانا بناتے ہوٸے مسلسل لا الہ الا اللہ کا ذکر کر رہی ہوں جنت جانا تو پکا ہے ان شا۶اللہ۔“ اجالا نے ایسے کہا جیسے اس کا جنت میں داخلہ طے شدہ ہو۔
”ارے واہ لا الہ الا اللہ کا تو مطلب ہی یہ ہے کہ اللہ کے سوا کوٸی معبود نہیں اور جب اس معبود برحق نے نماز کے لیے بلا لیا اور ہم اپنے ہی کاموں میں مصروف رہیں اور نماز کی جانب پیش قدمی نہیں کی تو گویا زبان سے کیے گٸے ذکر کو عمل سے رد کر دیا۔
اور نماز تو وہ اہم ترین عبادت ہے جو اسلام کی بنیاد ہے۔ بنیاد سے ہٹ بھی گٸے اور جنت پر استحقاق بھی قاٸم رکھے ہوٸے ہیں۔ سوچنا چاہیے بنی اسراٸیل والا طرز عمل تو نہیں ہمارا؟“منزہ آپی بات کرتے کرتے چولہے کے قریب آگٸیں تھیں۔
سالن کے نیچے آنچ دھیمی کرنے کے بعد انہوں نے چاول بھی دم پر لگا دٸیے۔ چلو اب پہلے نماز پڑھیں پھر باقی کام مل کر کرتی ہیں ،
” تمہیں پتہ ہے اجالا قرآن مجید میں نماز کے قیام کا حکم سات سو مرتبہ آیا ہے۔“ ”سات سو مرتبہ!“ اجالا نے حیرت سے پلکیں جھپکاٸیں۔
”جی ہاں! اور سورہ مدثر میں دوزخیوں اور جنتیوں کا مکالمہ سنایا گیا ہے اس کے الفاظ یہی تو ہیں:
”تمہیں دوزخ میں کیا چیز لے آٸی؟
کہنے لگے ہم نماز نہیں پڑھتے تھے۔ ہم نمازیوں میں سے نہ تھے۔““
”اوہ خدایا! دوزخ تو بہت بری جگہ ہے۔ آگ، سانپ، بچھو، تارکول کے لباس۔ اجالا کے سامنے دوزخ کا نقشہ کھنچ گیا تھا۔”تو پھر جنت کی کنجی لینی ہے اجالا جی یا ۔۔۔۔۔“ منزہ آپی نے شرارت سے اجالا کی طرف دیکھا۔
”یا وا کچھ نہیں میں اتنی بھی بےوقوف نہیں کہ جنت کے سرسبز و شاداب پھلوں سے بھرے باغات، ٹھنڈے میٹھے چشمے اور رنگا رنگ کھانے چھوڑ کر دہکتی آگ، دوزخیوں کی پیپ اور تھور کے کانٹوں کے پیچھے جاٶں۔“
اجالا نے خوف سے کانوں کو ہاتھ لگاٸے اور وضو کرنے چل دی۔منزہ آپی اور اجالا اپنے کمرے کے کونے میں خشوع و خضوع سے نماز ادا کر رہی تھیں۔ وہ جنت کی طلب گار تھیں۔
