جویریہ ریاض :
بعض چھوٹی چھوٹی تبدیلیاں انسان کی زندگی پر بہت بڑا اثر مرتب کرتی ہیں۔ اس ضمن میں آپ کا اٹھایا گیا ہر مثبت قدم خوش آئند زندگی کی ضمانت ہوتا ہے، کچھ مشکل کام کر کے آپ اپنی زندگی کو آسان اور خوشحال بنا سکتے ہیں ، اس سے قطعا فرق نہیں پڑتا کہ آپ اپنی عمر کے کس حصے میں ہیں، جب آپ یہ تحریر پڑھ رہے ہیں، اب بھی آپ کے پاس اپنی زندگی کو بہترین بنانے کے مواقع موجود ہیں۔
آپ کی زندگی بہترین کیسے ہو گی؟ ذیل میں چند ایک کام تحریر کئے جاتے ہیں جو آپ کی خوشیوں کی تکمیل کا موجب بن سکتے ہیں:
سوال اٹھائیں
دنیا کے بارے میں مکمل طور پر جاننے کےلئے ضروری ہے کہ آپ اس کے حقیقی معنوں پہ سوال اٹھائیں، ان کے متعلق سوچیں ،انھیں سمجھنا شروع کریں ، صرف خبرنامہ دیکھ لینا یا رسائل و جرائد پڑھ لینا دنیا کے متعلق جان لینےکےلئے کافی نہیں ہوتا۔ ضروری ہے کہ آپ اپنے آس پاس کی دنیا پر مثبت انداز سے سوچنا شروع کریں ، آپ دیکھیں گے کہ آپ کی معلومات میں بے پناہ اضافہ ہو گا۔
مخلص رہیں
دائمی خوشی سے ہم کنار ہونے کےلئے ضروری ہے کہ آپ تہہ دل سے اپنے ساتھ مخلص رہیں، پھر اپنے اردگرد کے لوگوں کے ساتھ مخلص رہیں، اپنی ذات کے ساتھ اخلاص کی عادت آپ کو سکون مہیا کرے گی۔
جلدی جاگنےکی عادت اپنائیں
چونکہ زندگی مختصر ہے لہذا ضروری ہے کہ کم وقت میں زیادہ سیکھا جائے، اس لئے جلدی جاگنےکی عادت اپنائیں اور اپنے دن میں زیادہ سے زیادہ فوائد حاصل کریں۔
ناممکن چیزوں پہ نظر رکھیں اور انھیں ممکن بنائیں
اگر آپ اپنی زندگی میں مسحور کن تجربات کرنا چاہتے ہیں تو وہ کام کریں ، جنھیں کرتے ہوئے دوسرے لوگ خوفزدہ ہوتے ہیں۔ اپنے مقاصد میں ناکامی کا خوف دل سے نکال دیں ، ناکامی کا خوف ختم ہو گا تو آپ اپنے مقاصد کی طرف مضبوطی سے پیش قدمی کر سکیں گے۔
ایک وقت میں ایک کام کو ترجیح دیں
ایک وقت میں ایک کام سیکھیں اور اسی میں مہارت حاصل کریں ، جس کام کے لئے آپ پرجوش ہیں اس سے شروعات کریں پھر آپ کی راہ کی رکاوٹیں ختم ہوجائیں گی۔
مشکل وقت کےلئے بچا کر رکھنا سیکھیں
زندگی میں مختلف تجربات کرنا، اور ان سے لطف اندوز ہونا اچھی عادت ہے لیکن ہمیشہ مستقبل میں پیش آنے والے غیر متوقع حالات کےلئے رقم بچانا سیکھیں۔ اگر ابھی تک آپ نے اس کا آغاز نہیں کیا تو بچت کرنا شروع کریں ، اس اقدام کےلئے آپ مستقبل میں اپنے شکر گزار ہوں گے۔
