تم کس بنیاد پر جشن مناتے ہو؟

عائشہ رفعت :

اگست کا مہینہ شروع ہوتے ہی ہر طرف آزادی کہ نعرے بلند ہوتے ہیں، بچے 14 اگست کے لیے شاپنگ کرتے ہیں،ہر طرف سبز پرچم،لائٹوں اور جھنڈیوں سے وطن کو سجایا جاتا ہے۔

کیا آپ مطمئین ہیں کہ ہمیں آزادی مل گئی؟ہم آزاد ہیں؟ ہم اپنے ملک کے فیصلہ کرنے میں آزاد ہیں؟ کیا ہمیں وہ ملک مل گیا جس زمین کا خواب دیکھا گیا تھا؟

قائد اعظم سے کسی نے پوچھا: اس ملک کا آئین کیا ہو گا؟
انہوں نےجواب دیا :”آئین تو چودہ سو سال پہلے ہی بن گیا تھا۔“

سوال یہ ہے کہ کیا پاکستان میں وہی آئین ہے جو چودہ سو سال پہلے ہمیں دیا گیا تھا ؟ آئے دن اسمبلی اجلاس میں نئے بل نئے آئین پاس ہوتے ہیں تو ایک دن جشن آزادی منانے سے ہمارے مسائل ختم ہو جائیں گے؟ ہمارے حکمران غلامی چھوڑ دیں گے؟ ہم ذہنی طور پر آزاد ہو جائیں گے؟

اس کو چھوڑیں، اب تو ہمارا ملک %75 قرضے میں ڈوبا ہوا ہے ۔ کیا اب بھی ہم خوشی سے جشن آزادی منائیں ۔ کشمیر میں کرفیو لگے ایک سال سے زیادہ ہو گیا۔ اگر ہم کشمیر کو اپنی زمین کا حصہ مانتے ہیں اور یہ نعرہ لگاتے ہیں کہ ” ہم کشمیری ہیں کشمیر ہمارا ہے“ تو بتائیے کہ اگر آپ کی زمین کا ایک حصہ عرصہ سے قید ہو، وہاں کے لوگوں کو جمعہ اور عید کی نماز تک کی ادائیگی نہ کرنے دی جائے، وہ بنیادی سہولیات سے محروم ہوں تو آپ کا یہاں بے فکری سے جشن آزادی منانا کس بات کی نشاندہی کرتا ہے؟

آپ کس بنیاد پر جشن مناتے ہیں؟
اس بڑھیا کی حالت پر جشن مناتے ہیں جو بیس سال سے عدل کی راہیں دیکھتی ہے کہ کب اسے انصاف ملے؟

کہتے ہیں بہت مشکلات سے یہ وطن ملا ، آزادی کی قدر کرنی چاہیے لیکن پاکستانی بھی کب تک جھنڈیاں لہرا کر نغمہ سن سن کر دل بہلائیں؟

کیا آزادی کا جشن وہ باپ منائے جو غربت اور بے روزگاری میں ڈوبا ہوا ہے ؟ جس کہ بچے کئی دنوں سے فاقہ پر مجبور ہیں یا وہ کسان جو سارا سال اس وطن کی زمین کو سرسبز کرتا ہے،محنت کرتا ہے اگر اسے قرض ملتا ہے تو سود پر؟ یا وہ ماں جشن منائے جس نے سانحہ پشاور میں اپنا بچہ کھو دیا؟ سچ تو یہ ہے کہ ہم اپنے ملک میں بھی محفوظ نہیں کئی زینب کیس اور بھی ہیں۔۔۔۔؟؟؟؟

کتنے ہی برس بیت چکے ہیں لیکن ہم پاکستان کی بیٹی عافیہ صدیقی کو نہ آزاد کرا سکے، ہم اپنے حق کے لیے کھڑے نہیں ہو سکتے ، پھر ہم آزاد ہونے کا دعویٰ کیوں کریں؟

کیا ہم اس دیس کا جشن مناتے ہیں جو تقسیم ہو گیا؟
میرا خیال ہے ہمیں مکمل آزادی حاصل کرنے کے لیے جدوجہد کرنی چاہیے، تب ہم جشن منانے کا استحقاق رکھتے ہیں۔

اگر آپ سمجھتے ہیں کہ ہمیں جتنی آزادی ملی ہے اتنی کافی ہے تو پھر آپ کو” جشن آزادی مبارک “۔
پھراس جشن میں، میں بھی شامل ہوں نوحوں سے بھرا کشکول لیے۔