اسے رنگ اچھے لگتے تھے

دعا عظیمی/ تصاویر: فرحت افزا

اسے رنگ اچھے لگتے تھے،
دولہن کے عارض پہ حیا کےرنگ،
ہیر کے مزار پہ وفا کے رنگ
قیدیوں کے ماتھے پہ حبس بے جا کے رنگ
مزدور کے دامن پہ حسرت سیاہ کے رنگ،
شام کی تنہائی میں ذات کے رنگ،
سیاہ بال کھولے اداسیوں کے چہرے پہ دعا کے رنگ،

شاید اس نے سارا بچپن رنگوں کو جمع کرنے ساری جوانی رنگوں کو سمیٹنے میں لگا دی تھی۔
ہجرت سے پہلے وہ اپنی مٹھی کھول دینا چاہتی تھی،
وہ اپنا دامن جھاڑ دینا چاہتی تھی،
وہ خالی ہاتھ آئی تھی اور خالی ہاتھ ہی جانا چاہتی تھی۔

اسے معلوم تھا جانے والے کو سفید رنگ اوڑھنا ہوتا ہے،
اسے معلوم تھا خاکی رنگ سے بڑا کوئی رنگ نہی،

اب اس نے اپنے سبز مقدس صفحوں میں رکھے مور کے پر پڑھنے والے بچوں کو دان کر دیے تھے
اب اس نے شاعری کی کتابوں میں مرجھائے پھولوں کو مٹی میں دفن کر دیا تھااور تتلیوں کے پروں میں خود کو باندھ کر ہوا برد کر دیا تھا

ہوا نے سارے رنگوں کے گہنے پھولوں کو لوٹا دیے تھے،
خاکی رنگ دھنک رنگ لپیٹے مسکرا رہا تھا۔