نجیب بھائی نے ٹھیک کہا تھا

طارق حبیب۔۔۔۔۔
جنگ گروپ کے معروف کرائم رپورٹر نجیب پیجی مرحوم کہا کرتے تھے کہ۔۔۔۔
"بچہ پارٹی:دیکھو کرائم رپورٹنگ آسان نہیں ہے۔۔۔۔ روزانہ درجنوں کلیجہ چیرتے واقعات سننے اور دیکھنے پڑتے ہیں۔۔۔۔۔ دل برداشت نہیں کرسکتا”….. اگر اس شعبے کو چن لو تو پھر۔۔۔۔۔ہر مظلوم کے ساتھ بے دھڑک کھڑے ہوجانا۔۔۔۔

اور پھر واقعی ان کا دل برداشت نہ کرسکا ۔۔۔۔۔ اور وہ دل کا دورہ پڑنے سے اپنے خالق حقیقی سے جا ملے۔۔۔۔

ان کے الفاظ ہر اس لمحے یاد آتے ہیں ۔۔۔۔ جب دن رات کسی بھی وقت فون کی گھنٹی بجتی ہے۔۔۔۔۔اور ایک نیا سانحہ سننے کو ملتا ہے۔۔۔۔۔

سمجھ نہیں آتا کیا کروں۔۔۔۔۔

فرشتہ کے باپ و بھائی سے بات ہوتی ہے تو اس کا ماتم کروں۔۔۔۔ یا اس بوڑھے باپ سے فون پہر بات کرنے کے بعد نقیب اللہ محسود کا نوحہ لکھوں۔۔۔۔ یا ۔۔۔۔ انصاف کیلئے در در بھٹکنے والے سانحہ ساہیوال کے بچوں کے حالات ان کے چچا کی زبانی جان کر ان کا مرثیہ پڑھوں۔۔۔۔ یا ان درجنوں فیملیز کے کرب لکھوں کہ ۔۔۔۔ جن کے اب نمبر دیکھ کر ہی دل دھڑکتا ہے کہ۔۔۔۔۔کیا امید دلائوں۔۔۔۔

کیا کروں۔۔۔۔۔

سوچ رہا ہوں فیس بک استعمال کرنا چھوڑ دوں۔۔۔۔

ان باکس میں شوہر، بھائی، باپ، بیٹے کے لاپتہ ہونے کی اطلاعات کیسے دیتے ہیں۔۔۔۔ کرب کا کچھ اندازہ تو آنے والے میسیجز کے الفاظ سے ہی ہوجاتا ہے۔۔۔۔۔ کہ الفاظ بھی بین کرتے ہیں۔۔۔۔۔ پھر جب ان اہل خانہ سے تکلیف دہ حالات سننے کو ملتے ہیں تو ۔۔۔۔ اندازہ ہوتا ہے راتوں کی تاریکی بھیانک کیوں ہوتی ہے۔۔۔۔۔

یہ لوگ ایک صحافی کو مسیحا سمجھ کر دل کھول کے رکھ دیتے ہیں۔۔۔۔مگر یہ نہیں جانتے کہ وہ کر ہی کیا سکتا ہے۔۔۔۔۔جو وہ بتا رہیں وہ بھی نہیں لکھ سکتا۔۔۔۔۔بس کڑھ سکتا ہے۔۔۔۔ اور پھر نظام کی نااہلی کا اندازہ کریں ۔۔۔۔۔۔۔

آگہی موت ہے۔۔۔۔ پھر۔۔۔۔۔ جاننا اور مسلسل جانتے چلے جانا۔۔۔۔ اذیت ناک موت۔۔۔۔۔ بے بسی ہی بے بسی۔۔۔۔

نہ کچھ کرسکتے۔۔۔۔۔نہ کچھ کہہ سکتے۔۔۔۔نہ کچھ لکھ سکتے۔۔۔۔۔

اور اب تو تبدیلی کی لاش سے اٹھتا تعفن۔۔۔۔۔ دماغ میں کوئی امید پیدا ہی نہیں ہونے دیتا۔۔۔۔۔

نجیب بھائی آپ نے ٹھیک کہا تھا۔۔۔۔بہت بڑی غلطی کردی۔۔۔۔۔

نجیب بھائی نے ٹھیک کہا تھارہے نام مولا کا