اسٹیبلشمنٹ اور عدالت عظمیٰ شدید مشکل میں پھنس گئیں

جمال عبداللہ عثمان

ممکن ہے کہ آپ اس تازہ سیاسی صورتِ حال میں حکومت اور اپوزیشن کو ہی فریق سمجھ رہے ہوں ۔ جیت اور ہار کے لیے نظریں بھی ان دونوں پر ہی ہوں۔ لیکن ان دونوں سے آگے دو فریق اور بھی ہیں۔ اس جنگ میں جن کا بہت کچھ داؤ پر لگا ہوا ہے۔ اور جنہیں اس وقت سب سے زیادہ پریشانی کا سامنا ہے۔

ایک پاکستان کی اعلیٰ ترین عدالت یعنی سپریم کورٹ۔ جس کے سامنے اس وقت معاملہ یہ ہے کہ اگر وہ تحریک عدم اعتماد پر اسپیکر کی رولنگ کو ریورس کرتی ہے تو پی ٹی آئی کی طرف سے شدید ردِعمل کا سامنا کرنا پڑے گا۔ اور اگر اسپیکر کی رولنگ کو درست قرار دیتی ہے اور کہتی ہے کہ عدالت اس معاملے میں کچھ نہیں کرسکتی تو اس کے نتیجے میں آدھی سے زیادہ اسمبلی ”غدار” اور ملک دشمن قرار پاتی ہے۔ جس کا بوجھ اُٹھانا بھی یقینا اس کے لیے آسان نہیں ہوگا۔

یہ بھی پڑھیے
تحریک عدم اعتماد : ڈپٹی سپیکر کی رولنگ ، ماہرین قانون کیا کہتے ہیں؟

عمران خان کو بڑی مصیبت کا سامنا

پرویز الٰہی کا مستقبل کیا ہوگا ؟

دوسری طرف، اسٹیبلشمنٹ ہے۔ وہ بھی اس وقت عجیب مشکل کا شکار ہے۔ حکومت نے نیشنل سیکورٹی کمیٹی کا اجلاس طلب کیا۔ بندوق اس کے کندھے پر رکھ کر چلادی۔ یعنی اس وقت حکومت مسلسل یہ بات کررہی ہے کہ ہم نے پاکستان کے خلاف ہونے والی ”سازش“ پر قومی سلامتی کمیٹی کا اجلاس بلایا۔ اس میں تینوں سروسز کے چیفس موجود تھے۔ ان کی موجودگی میں اس ”سازش” پر نہ صرف بات ہوئی، بلکہ اعلامیہ بھی جاری کیا گیا۔ یعنی پی ٹی آئی کے بقول ہم نے اس ”سازش“ پر عسکری سربراہان کی مہر تصدیق ثبت کروادی ہے۔

اسٹیبلشمنٹ اپنے ”ذرائع” سے اپوزیشن کو مطمئن کرنے کی پوری کوشش تو ضرور کررہی ہے ۔ معلوم اور نامعلوم نمبروں سے خبریں بھی فیڈ کروارہی ہے، لیکن اس کے باوجود جب تک وہ کھل کر سامنے نہیں آتی ، تب تک یہ غبار ویسا ہی رہے گا۔ اس کا فائدہ حکومت اب بھی اُٹھارہی ہے اور مستقبل میں بھی وہ اسے اپنے مفاد کے لیے استعمال کرے گی۔

اب اگر اسٹیبلشمنٹ کھل کر سامنے آتی ہے اور کہتی ہے کہ ایسی کسی سازش کا کوئی ذکر اس اجلاس میں نہیں کیا گیا۔ نہ ہی اجلاس کے منٹس میں اس کا کوئی تذکرہ موجود ہے تو پی ٹی آئی کے غیظ وغضب کا سامنا کرنا پڑے گا۔ وضاحت نہیں آتی تو اپوزیشن اس تمام معاملے میں اسٹیبلشمنٹ کو ذمہ دار ٹھہرائے گی اور اس کی بندوقوں کا رُخ ایک بار پھر اسٹیبلشمنٹ کی جانب ہوگا۔ کل، آصف زرداری ، بلاول بھٹو اور مولانا فضل الرحمن نے اسی وجہ سے اسٹیبلشمنٹ کو اپنی پوزیشن واضح کرنے کا مطالبہ کیا ہے۔

سو اس وقت اپوزیشن اور حکومت، دونوں جن چیلنجز کا سامنا کررہی ہیں، اس سے بڑھ کر پریشانی ان دو اداروں کو ہے۔ لہٰذا دونوں سر جوڑکر بیٹھے ہیں کہ ایسا کون سا درمیانی راستہ نکالا جائے جس سے دونوں کے غصے سے بچا جائے ۔

کیا ہی بہتر ہوتا کہ ہر ادارہ آئین اور قانون کے مطابق چلتا۔ ایسا ہونے کی صورت میں ہی اس غیرضروری پریشانی سے بچنا ممکن ہوتا۔